Frábærri ferð til Túnis er lokið og við komin heim i hversdaginn. Við mættum í ferðina án þess að þekkja nokkurn mann, en á þessum 8 dögum kynntumst við yndislegu fólki sem náði vel saman bæði á golfvellinum og utan hans. Þar á fararstjórinn Sigurður Pétursson ekki sístan hlut. Hann hélt hópnum saman allan tímann með kennslu á völlunum og skipulagi á golfinu. Fyrir okkur Önnu var þessi ferð upplifun þar sem þetta var í fyrsta sinn sem við fórum í golfferð en verður alveg örugglega ekki sú síðasta.

Haldin voru tvö mót í ferðinni, golfmót FB, sem var einstaklingskeppni. Þar var sigurvegari í karlaflokki Þorsteinn Gunnarsson og í kvennaflokki María Sigurðardóttir. Síðan var Bændaglíma þar sem rauðir kepptu á móti bláum. Bændaglíman var spiluð á La Forêt-vellinum en golfmót FB á Les Oliviers. Bændaglímuna vann rauða liðið. Við Anna vorum í bláa liðinu og þurfti liðið að syngja tvö lög, annað á barnum á hótelinu og hitt á veitingastað, Pomodoro, sem við fórum á á laugardagskvöldinu, síðasta kvöldinu í Túnis. Texti var saminn í snarheitum sem sunginn var á barnum en á veitingastaðnum var Litla flugan sungin undir styrkri stjórn sérstaks tónlistarráðunauts blárra, Hængs Þorsteinssonar.