Eiríkur Þór Einarsson
f. 5. febrúar 1950 í Vestmannaeyjum
Menntun
- Barnaskóli og Gagnfræðaskólinn í Vestmannaeyjum
- Stúdentspróf frá Menntaskólanum á Akureyri 1970
- BA-próf í bókasafnsfræði frá Háskóla Íslands 1981
- Próf frá Leiðsöguskóla Íslands 2001 (enska)
Vinnustaðir
- Vinnustaður frá 1. júní 1971 – 31. des. 2006: Sjávarútvegsbókasafnið á Hafrannsóknastofnun og Rannsóknastofnun fiskiðnaðarins
- Vinnustaður frá 1. janúar 2007 til 30. júní 2013: Siglingastofnun
- Vinnustaður frá 1. júlí 2013 til 31. des. 2016: Samgöngustofa
- Frá 2001 hef ég verið leiðsögumaður í hjáverkum og – eftir að starfsævi hjá Ríkinu lauk – leiðsögumaður að aðalstarfi
Áhugamál
- Ég hef áhuga á ættfræði, sérstaklega því sem við kemur minni ætt, þ.e. vestfirskum ættum í föðurætt og ættum úr Vestur-Skaftafellssýslu í móðurætt. Sjálfur er ég fæddur og uppalinn í Vestmannaeyjum til tvítugs og hef þar af leiðandi miklar taugar þangað. Ég var formaður Ættfræðifélgsins (frá vori 2004 til vors 2008 og aftur frá 2021) og í stjórn félagsins frá 2014.
- Ég hafði einnig mikinn áhuga á gönguferðum og hjólreiðum um landið, en frá 1982 hef ég gengið töluvert um landið sunnanvert, þ.e. að mestu í óbyggðum. Árið 1997 fór ég fyrstu óbyggðaferðina á hjóli með hjólreiðaklúbbi nokkurra starfsmanna á Hafró, “Bergmál frá hjólum”, og líkaði vel. Önnur ferð var farin sumarið 1998 og var hún ekki síðri en sú fyrsta. Lítið hefur farið fyrir löngum göngu- og hjólaferðum frá árinu 2000, en því meira er um stuttar gönguferðir í nágrenni höfðuborgarsvæðisins, með gönguhópnum Álfunum og með félögum frá menntaskólaárunum á Akureyri.
- Ég hef lokið leiðsögunámi notaði það nám til leiðsagnar túrista, bæði innlendra og erlendra frá 2001. Var formaður Félags leiðsögumanna tímabilið 2002-2003.
- Ég hef einnig mikinn áhuga á ljósmyndun, þó að um tíma hafi ég ekki gert eins mikið af því að taka myndir og ég gerði meðan ég var í Eyjum. Þó tek ég alltaf mikið af myndum í fjallaferðum og á orðið töluvert myndasafn úr þeim ferðum, aðallega slides-myndir. Nú tek ég á stafræna myndavél og er sýnishorn af myndum er hér á síðunni. Ljósmyndaáhuginn hefur aukist mjög með tilkomu stafrænu myndavélanna og tek ég fleiri myndir nú en nokkru sinni eins og sést á myndasíðunum á þessum síðum og víðar. Einnig hef ég skannað gamlar myndir sem fara síðan að einhverju leyti inn á síðuna.
- Ég var í stjórn Knattspyrnudeildar Knattspyrnufélagsins Víkings árin 1994-1997 og hef starfað mikið innan Víkings frá árinu 1992, aðallega að unglingamálum. Það kemur aðallega til af því að yngri sonur minn, Finnur, æfði fótbolta, og reyndar handbolta líka, með Víkingi. Anna, konan mín, var gjaldkeri Handknattleiksdeildar Víkings frá 1995-97 og höfum við þar af leiðandi verið mjög mikið í Víkinni. Anna var í Aðalstjórn Víkings frá 1997-2001 og ég hef verið í fulltrúaráði Víkings og fulltrúi Víkings í Knattspyrnuráði Reykjavíkur frá 1997 fyrst sem varafulltrúi, síðan gjaldkeri ráðsins 1999-2001 og varaformaður frá 2001 til 2023 þegar mér loks tókst að hætta.
- Nýjasta dellan er svo golfið. Við hjónin höfum bæði verið ofurseld golfinu síðan árið 2004. Anna byrjaði og dró mig með. Árangur er ekki til að hrópa húrra fyrir en það skiptir engu máli. Það er hreyfingin og félagsskapurinn sem skiptir máli.