Útilistaverk á Íslandi

Fyrir nokkrum árum datt mér í hug að taka myndir af útilistaverkum sem ég sá á ferðum mínum um landið sem leiðsögumaður. Ég komst nefnilega að því að þau voru fleiri og á fleiri stöðum en ég hafði hugmynd um áður og ekki voru þau öll merkt höfundum. Það hefur því verið dálítil vinna að reyna að finna út höfunda verkanna, en það hefur tekist í flestum tilfellum.
Vestmannaeyjar

Á þessum síðum ætla ég að gera tilraun til að skrásetja þessi útilistaverk og kannski kemur þessi skrá að gagni fyrir einhverja.

Listaverkin eru margskonar, allt frá styttum sem við sjáum víða og til veggjalistar. Oft þurfti ég að velja: hvað er list og hvað ekki. Skoðanir á því eru margar og kannski engin rétt – eða allar. Listaverkin eru sem sagt alls konar. Einnig er erfitt að gera greinarmun á listaverki og minnisvarða, en ef minnisvarðinn var annað en steindrangur með skildi eða skjöldur á staur var það flokkað einnig sem listaverk. Oft eru listaverk á steindröngum t.d. brjóstmyndir, en ég læt duga að hafa þau með minnisvörðum. Einnig eru brjóstmyndir á mörgum minningamörkum í kirkjugörðum, en ég set þau verk ekki hér.

Ég flokka listaverkin eftir höfundum. Afsteypur sumra verka eru á mörgum stöðum og er því sennilega skynsamlegast að raða þeim eftir höfundum í stafrófsröð. Verkin eru mjög misjafnlega mörg eftir listamennina og í hverjum landshluta, en útilistaverk eru langflest í Reykjavík eins og gefur að skilja. Þar eru til dæmis þrír listaverkagarðar, þar sem listaverk Einars Jónssonar, Ásmundar Sveinssonar og Sigurjóns Ólafssonar eru sýnd. Reynar eru tveir aðrir slíkir garðar með verkum Hallsteins Sigurðssonar, annar í Grafarvogi og hinn við Ystasel í Reykjavík. Útilistaverk eru ótrúlega víða og eftir ótrúlega marga listamenn. 

Hér eru útilistaverk í Vestmannaeyjum